IKT eta KONPETENTZIA DIGITALA HEZKUNTZAN

2018-02-07

2018ko Internet Seguruaren Nazioarteko Eguneko berriak.

Mundu guztian barna ospatu zen atzo Internet Seguruaren Nazioarteko Eguna.
UPV/EHUko EU Kids Online taldeak eta UNICEFek ‘Arrakala digitalaren haurrak Espainian’ txostenaren emaitzak ezagutzera eman zituzten.

Hona hemen CAMPUSAk bildu dituen alderdirik adierazgarrienak:

"Euskadin, (10-15 urteko) haurren % 97,6k erabiltzen dute Internet, % 94,9k ordenagailua erabili zuten azken hiru hilabeteetan eta % 77,5ek sakelako telefonoa dute, (INE)"

"Sarbide digitalak onurak eta aukerak ez ezik arriskuak ere ekartzen dizkie haurrei; besteak beste, eduki kaltegarrietara sartzea, sexu esplotazioa, jazarpena eta ziberjazarpena gertatzeko arriskua handitzea, eta informazio pribatua modu desegokian erabiltzea.

"Tradizioz biktimizatu izan diren kolektiboetako haurrak dira kalteberenak, esaterako ijitoen eta LGTBI komunitateko haurrak eta migrazio jatorriko haurrak, eta haiek jasotzen dute eraso gehien Interneten."

"(Aldi berean) haur kalteberenentzat, Internet funtsezkoa izan daiteke beren gaitasuna garatzeko, hobeto integratzeko eta erreferenteak eta laguntza bilatzeko, besteak beste."

Ez izan izar kanpaina (#NoSeasEstrella) jarri dute abian.

Hona hemen Estefania Jimenez (UPV-EHUko ikerlaria) Euskadi Irratian ikerlan honen harira ondorioztatutakoak komentatzen.

2018-01-20

Guztiok ziborg-ak? (Jendea, makinak eta kontraesanak.)

Amber Case ziborg-antropologaria entzuten hasi orduko buru barnean bor-bor hasten dira ideiak, usteak eta iritziak:

Gogora ekarri dizkit Coral Herrerak berriki Pikaran argitaraturiko "Emakume gorra eta cyborg-a" testigantza hunkigarria eta Gorka Juliok gai honen inguruan idatzitako Ziborg-ak gara sarrera. Bertan Neil Harbissonen, -munduak ziborg bezala kontsideratutako lehen pertsona-, biografia gogoratzen du. Baita Donna Harawayk bere Ziborg Manifestua-n egiten duen proposamena: ziborg-ek ekarri digute genero eta gorputzaren arteko mugen malgutasuna: ez humano ez makina, ez gizon ez emakume.

Bertze muturrean Dolors Reigek dioen moduan, oraindik hiritartasun eskubideak denentzat bermatzen ez dituen munduan robotak hiritar izendatuak... Eta gainera genero-ikuspegia sartuz gero, berriro sexu-genero estereotipo sexistak pil-pilean...

Zalantzarik gabe, nik Haraway eta Amber Case nahiago!

Iturria: Telos

2018-01-14

NETIKETAK (TRATU ONAK) ezinbestekoak ingurune digitalean.

NETIKETAK eremu digitalean komunikazio eraginkorra, positiboa eta begirunezkoa ahalbidetzen duten arau bilduma dira.

Ikasleek gero eta lehenago,in situ eta online continuum batean bizitzen ari dira haien egunerokotasuna. Hezitzaileondako erronka, beraz, inguru fisikoan egiten dugun bezalaxe, digitalean ere ondo komunikatzen konpetente izan daitezen bermatzea.

Hona hemen proposamen bat:

Gehiago jakiteko:

PENDIDIKAN BERRERAIKITZEN

2017-12-06

Konpetente digitalak izateko bidean. #HEZikt (2016-2017)

https://addi.ehu.es/handle/10810/23359

Gaurkoan iaz burutu nuen IKTak eta Konpetentzia Digitalak Hezkuntzan, Etengabeko Formakuntzan, eta Hizkuntzen Irakaskuntzan Graduondokoan egindakoaren azken proiektuaren berri ekartzen dizuet. Zuzendari lanetan Amaia Arroyo doktorea izan nuen bidelagun:

"Hezkuntza-eremuan bizitzen ari garen trantsizio-une honetan, gauza gutxi dira ziurrak eta horietako bat teknologia digitalen nonahikotasuna da.

Teknologiaz, pantailez inguraturik bizi gara eta, hezitzaileok gure bizitzaren parte gisa integratzen ari garen bitartean, ikasleak teknologiaz inguraturik hazi dira eta halakorik gabeko bizimodua ulertezina egiten zaie. Hezkuntza-eremuan, orain arte DBHko ikastetxeetan, ikasleak oinarrizko teknologia- erabiltzaile gisa trebatzen aritu izan dira irakasleen araberako eskakizunen baitan, baina ez da ildo nagusirik izan.

Heziberri 2020k (EHAA, 1 2015, 69-72 or.), ordea, aldaketa handia ekarri du, izan ere, Konpetentzia Digitala zeharkako konpetentzia bezala zehaztu du; denok irakasgai guztietan landu beharrekoa, alegia.

Horretarako, DIGCOMP marko europarra erreferentziatzat harturik, landu beharreko 5 arlo hauek aipatzen ditu: informazioa, komunikazioa, edukiak sortzea, segurtasuna eta arazoak ebaztea. Gainera, 12. artikuluan argi adierazten du: “Oinarrizko Hezkuntza amaitzen duten ikasleek konpetentzia digital eta mediatikoa eskuratu behar dituzte, alfabetatze edo gaikuntza funtzional osoa bermatzeko” (EHAA 2 14. orr.).

Baliabideen erabilera etikoa eta arduratsua ere aipatzen du, besteak beste, kontuan hartuz pertsonen intimitatea, norberaren irudia eta sexu-joera eta -nortasuna, eta aurre eginez sexismoari eta arrazakeriari.

Nola egin bidea erabiltzaile izatetik konpetente digital izatera? Zer bide proposatu konpetentzia horren 5 arloak irakasleek zein ikasleek gradualki eta modu autonomoan garatzeko? Nola aprobetxatu online prestakuntzaren abantailak ikasleari era ordenatu batean eskolaz kanpo (edo eskolan bertan) bere ikaskuntza aberasteko aukerak eskaintzeko? (Eta bide batez, zeharka irakasleena zein senideena.)

Hori guztia zehaztea eta DBHko edozein ikastetxerentzako baliagarria izan litekeen proposamen zehatza aurkeztea izan da gure proiektuaren xedea."

DOKUMENTU OSOA ESKURATZEKO esteka:

HEMEN

2017-11-26

#Getxoblog 2017 UR saria #Wikiemakumeok proiektua.

Larunbata goizean aukera ederra izan nuen urtero sareetatik jarraitzen nuen topaketa batera bertaratzeko: Mentxu Ramiloren #wikiemakumeok proiektua saritua izan da!

Aurten hainbat tarte horretan inbertitzen ari naiz eta egitan gomendatzeko modukoa dela! Wikipedian editatzen ikasteko hilabetero in situ elkartzea eta ederki pasatzeak badu bere xarma!

Gure @mentxuwiki #wikipedian emakumeen presentzia indartzeko indarrak biltzen eta aukerak sortzen hasi zenean, ba zekien zertan ari zen!

2017-11-25

2.0 unibertsoan ikasleen artean ere genero-indarkeria PRESENTE!

Azaroak 25 eguna izaten da urtero mundu osoan barna emakume izate hutsagatik emakumeon kontrako indarkeria salatzeko eguna. Kalera ateratzeko eta #AskiDa eta #ErasorikEzErantzunikGabe oihukatzeko eguna. Hezkuntza eremuan ere aldarrikapen eguna da.

Unibertso digitalean jarri ohi dugu lupa txoko birtual honetan. Eta lupatxoak argi eta garbi erakusten du presentzialean gertatzen diren indarkeria matxistek, hemen ere badutela lekua hartua.

Ikasleak protagonista dituzten ikerketei solas egiten utziko diegu!

Berriki Katalunia, Aragoi, Galizia, Andaluzia, Balear eta Kanariar Uharteetako nerabeek sarean baden genero-indarkeriaren inguruko pertzeptzio, jarrera eta sineskerei buruzko ikerketa argitaratu dute. (UNED).

Datuen iturria:

DONOSO VÁZQUEZ, Trinidad, María José RUBIO HURTADO y Ruth VILÀ BAÑOS, 2018. La adolescencia ante la violencia de género 2.0: concepciones, conductas y experiencias. Educación XX1: Revista de la Facultad de Educación [linean = en línea]. Madrid: Universidad Nacional de Educación a Distancia, 2018, 21, (1), 109-134 [kontsulta = consulta: 2017/11/20]. ISSN 1139-613X. Interneten kontsultagarri hemen: http://revistas.uned.es/index.php/educacionXX1/article/view/20180/16715

Bestalde, Ikaskideen arteko tratu txarrak 2016 (ISEI-IVEI) Azken txostenak taula hau erakusten du:

Eta halakoen aurrean zer egin?

2017-11-15

Moodle unibertsotik kukuka. #MOOTEU17-ko kronika ttikia (eta gehiago.)

Duela 3 ikasturte ezagutu nuen MOODLEMOOT Euskadi, Moodle erabiltzen dutenen urteroko topaketa.

Geroztik urtero joan naiz eta baita urtetik urtera gehiago engantxatu ere! Giro ederra, euskalduna, hurbila, konfiantzazkoa. Zenbat gai berri, zenbat kide esku hartze interesgarriak aurkezten, zenbat ikasteko eta elkarrekin komentatzeko! Parekideen arteko ikaskuntzaren adibide xarmanta.

Eta bide batez, aukera izan dut Hezkidetzan Esku Hartzen (UPV/EHUren ikastaro osagarria) sortzean eta kudeatzean izandako bizipenak partekatzeko.

#Mooteu17n “On-line irakaslearen ezaugarriak eta garatu beharreko gaitasunak” mahai-inguruan neretako erreferenteak diren euskal emakumeekin hauekin batera: Amaia Arroyo, Itziar Kerexeta eta Rakel Gamito.